Nineung ka Budak Angon

Nineung

Paralun

Kaula rek ngaguar carita Pajajaran

Ku sabab

Pajajaran dijieun carita

Tapi disilok jeung diréka dirarobah

Ku anu sarieun

Ngadegna deui Pajajaran

Lain Pajajaran nu baheula

Lain Pajajaran nu kiwari anggeus leungit

Lain Pajajaran nu diarep-arep ku kahayang

Tapi, Pajajaran anu anyar

Anu napak tina uga dina jajaran anu satahap

Satampiyan dina saleuwi

Ngajajarkeun jeujeur sajati

Nyaeta Pasundan Islam

Nu ngajajar manjang ka wetan

Ngalonjor jolok ka kulon

Diratuan ku nu adil  

Ngalaman deui cara baheula

Boga raja heunteu sulaya

Pasundan Islam mahmur lain ngan ukur dilamun

Tapi mahmur nu karasa

Sabab di dieu mah adil téh lain omong anu kosong

Tapi adil anu bukti

Lain ngaran wungkul catur

Lain ngan omong pangbébénjo

Lain carita nu sulaya

Lain siga nagara nu ayeuna

Nu raja na ngan saukur loba jangji

Jangji eudeuk nyieun somah pada jembar jeung raharja

Tapi, nitah ngagarap sawah di salah wayah

Bubuntut salah nu ngatur

Panarat pabeulit dina cacadan

Arinyana barareunghar tina babangsat

Sararenang tina ruruba dararagang

Tapi, bari nyieun susah usaha somah

Padahal somah teh pada nyaho

éta raja teh monyét nu haréjo

Monyét nu garading

Kabéh monyét beuki kamalinaan mararabok kakawasaan

Hayoh dibaréré deui kakawasaan

Tapi, engké jaga bakal datang Budak angon

Bakal ngalungkeun sayang tawon

Bari ngakekesek somah anu mudu manjakeun bari nyuguhan

Sabab inyana geus sebel jasa

Neuleu monyet-monyet rarajaan

Inyana mudu ngalaman heula loba lalakon

Anggeus nyorang undur jaman datang jaman

Saban jaman mawa lalakon

Budak angon mah nyaho kana gantina jaman

Nu ciri gantina ti jelema-jelema caropot kedok

Rahasiah mararuka sorangan

Da arinyana anu nyaho lalakon

Bari tenget ka sakur nu di jaman édan ararédan

Pada-pada keur ngalalakon dina panggung sarwa sulaya

Tah budak angon nu éta anu dina pantun disebut-sebut Prabu Siliwangi

Budak angon anu weruh di semuna

Bari nyaho di jogona

Da arinyana mah lain ngangon kebo di sampalan

Lain ngangon badak di alas tangtu

Tapi, kalakay jeung tutunggul

Loba anu katimu ku arinyana

Tapi, loba ogé anu disumputkeun heula

Sabab acan wayah mudu dicaritakeun

Najan geus raraog mararénta  di lalakonkeun

Inyana pageuh nyekel tulak rahasiahna Pajajaran

Engké mun geus témbong budak angon

Datang ngabéjaan anggeus laguna ngarakrak panggung

Enggon kacolah anu é-édanan jaradi édan

Geus datang keuna dawuh

Mudu dirubuhkeun jeung didudutan

Balukarna? Rusuh gedé saamparan jagat

éta rusuh gedé mémang baris mudu kajadian

Lain digara-garakeun ku budak angon

Tapi, digara-garakeun ku monyét beureum jeung monyét hideung

Anu jaradi gara-gara gerna perang sanekala  

Caringin anu keur eunyeuh reuntasna kabawa caah

Monyét hideung karebut ka sabrang deui

Tapi, monyét-monyét anu beureum antep intip di pipir leuit

Ari monyét-monyét anu harejo

Arembung turun ti luhur panggung

Panggung rubuh! Dirubuhkeun talaga bedah

Anu bedah ku lini jeung ku gunung gedé

Di tambah ku tujuh gunung

Munding bulé, anjing bodas, mararodar diséréd guntur

Sakabéh rupa monyét pada haliwu

Sabab sarieun ditarempuhkeun leungitna nagara

Padahal heueuh lapurna nagara teh gara-gara monyét

Keukeuh harayang baé pangkawasana

Jeung keukeuh baé mudu turut ngatur nagara

Malah somah nu ditempuhkeun ku monyét 

Salegana nagara cara keur kahuruan

Loba seuneu loba cai

Tah didinya kara nyarariar  budak angon

Sejana dék marénta tumbal

Sabab, inyana nyaho anu bakal ngadegkeun deui Pajajaran

Pajajaran anu anyar ngadeg deui

Nyaéta Pasundan Islam

Jadi nagara anu nengah dina jajaran

Saamparan jeung satahap jeung nagara-nagara anu sahaté  

Orang Sunda araratoh

Sabab di saban kalang

Sunda deui anu unggul

Sunda deui anu meunang

Sunda deui anu jadi jawara!

Tapi, engké jaga bakal aya anu hiri dengki

Dina nyilih deui bangsa Sunda

Sabab arinyana saririk sieun kasili wawangi

Jeung sieun diterapkeunna hukum Allah

Tapi, jangji Allah pasti bukti

Menangkeun bangsa anu ngarti kana harum sajati   

Ku kituna engké jaga urang papag éta budak angon

Urang dukung ku sararéa

Nu bakal jadi panggeuing

Ka batur batur urut salembur

Ka dulur-dulur anu baheula

Pikeun ngadegna Pasundan Islam

Anu jembar hampurana

Nu subur tatanénna

Anu béra dagangeunnana

Anu ragem jeung papada nu hadé haténa

Engké jaga baris datang jaman

Bakal nyararaho

Bakal daratang deui jelema

Loba ménak loba pangkat

Harayang diaraku deui

Rawayan ti Pajajaran
(Gugun Sopian)